De forma inmediata, Urbanismo ordea só retirar o beirado, cheminea e parte das paredes. O propietario empezou onte a tomar as medidas de seguridade ordenadas pola Xerencia.

Demolición, pero sen prazos. A Xerencia de Urbanismo ordenou ao propietario do edificio situado no número 20 da rúa Real "que se atopa en estado ruinoso e que forzou o desaloxo de seis veciños" a retirada de varios elementos da estrutura de "forma inmediata" para previr caídas á vía pública ou aos inmobles lindeiros, aínda que non fixou unha data para a derriba, do que se fará cargo o dono. A

nte a resolución ditada polo Concello, o titular do inmoble xa contratou a unha empresa que comezou onte mesmo a tomar as medidas de seguridade establecidas polo goberno local.

Tras varias denuncias e multas por ter o edificio en mal estado e con risco de desprendementos, o propietario solicitou a licenza de demolición ante o requirimento de Urbanismo. "É posible que a derriba comece en dez días, pero se pode atrasar porque aínda faltan algúns trámites administrativos para conceder o permiso", sinala o concelleiro José Mariño. "A propiedade comprometeuse a que a empresa traballará todo o fin de semana para que o luns xa se poida reabrir a rúa e os veciños poidan volver ás súas casas", afirmou o edil de Urbanismo.

Medidas de seguridade

As actuacións "inmediatas" que o responsable do inmoble (de catro plantas) debe acometer antes do luns consisten na retirada do beirado da cuberta cara a rúa Real, que "presentan un perigo inminente de caída", aseguran os técnicos no seu informe; así como no desmonte da cheminea de pedra da medianeira que linda cun edificio de Teófilo Llorente "debido ao risco de envorco cara á edificación lindeira". O dono tamén debe eliminar a parede de ladrillo sen recebar que da a Teófilo Llorente e o peche de ladrillo da fachada desta mesmo rúa. Os puntais que sosteñen a fachada da vivenda pola rúa Real deben ser reforzados. No caso de que o propietario non cumpra as ordes da resolución emitida onte, enfrontarase a multas de entre 300 e 6.000 euros.

Pola súa banda, o tenente de alcalde, Santiago Domínguez, levará á Xunta de Goberno Local a través da vía de urxencia un expediente para actuar sobre as fachadas que presenten riscos de derrube. O nacionalista instou ao propietario do inmoble da rúa Real a "demoler a estrutura en dez días".   {mxc}